أسعد الله مساكم بكل خير !.. متابعينا الأعزاء بجميع الاطياف يسعدني ادعوكم إلي #إعتصام_ذوي_الإعاقة يوم الثلاثاء ٢٠ ديسمبر بعد صلاة العشاء حضوركم هو من سيوقف القرارات التعسفية ضدكم وضد أبنائكم وياريت تشاركونهم باعتصامهم ولكن جزيل الشكر .. لان عندما يوكل الأمر لغير أهله ينقلب الحق باطلا وينقلب الباطل حقا قالها الخبير ثم أضاف هيئة ذوي الإعاقة وضعت لخدمة ذوي الإعاقة لا لتعطيلهم ونحن وهم باعتصامنا لم نطالب إلا بتطبيق القانون وبس .
الشايب : وش السالفة نورونا عسي ماشر وش جاري عند المعاقين ؟.. وش مناسبة هالاعتصام ؟.
الخبير : يشرفني الحضور لمقر الاعتصام بساحة الإرادة بعد ان دعاني اخوي المعاق حفظه الله وبهذه المناسبة أطالب الجميع بالحضور وعدم التغيب .. لان احترام حقوق المعاق ينم عن تقدم الفرد والدولة ولهذا يجب علينا تقديم الخدمات لهم بدون أي منه .. إلى من يهمة الأمر إلى متى وذوي الإعاقة يعانون من الهيئة ؟.. ماذا تنتظرون أكثر من هالمعاناة والتخبط ؟.. وأما بخصوص سوْال حضرتك ياحج اترك الإجابة لأخي المعاق يجاوبك .
المعاق : الموضوع ومافيه ياحجي الكثير من المعاقين وانا منهم نعاني من هالهيئة تصدق كل خمس سنوات أعيد الفحص لتجديد الهوية ومع هذا كلى رضى اروح اقدم واجدد بكل راحه نفسيه الا هالمرة لي ثلاث أشهر من دخلت اللجنة والقرار ما طلع كل يوم باكر عند هالهيئة التعيسة .. والله قصتنا قصه شهرين لموعد لجنة وثلاثة للحين ماكو خبر واللي منطبق على ينطبق على اخواني المعاقين .. ايه ليش اعادة التقييم والإعاقة دائمة والله ذبحونا كل مرة لازم تجدد شهادة الإعاقة !.. يعني مو كافينا التعرض للاهانة والانتظار من بعض الموظفين اللي جن الواحد يطر منهم !.
الشاب : الله يكون بعونكم واضم صوتي لكم وانا معاكم باعتصامكم ان الله عيشنا ليوم الثلاثاء .
المعاق : والله ياجماعة تعبنا من هالهيئة ليش يجبرون المعاق ومن يرعاه للنزول إلى ساحة الإرادة للمطالبه بحقوقه الذي اكتسبها بالقانون ؟.. الله يهدي حكومتنا الرشيده منذ تأسيس الهيئه وهي ما تعين إلا مدير سيئ وتشيله وتجيب أسوء منه وللاسف الإداره الجديده أسوأهم على الاطلاق !.. ما أقول إلا الله يعين المعاق لان من صارت هالهيئة وهي تتفنن في ايذاء المعاقين وأهاليهم وفي المقابل تسمح بالتزوير والواسطات لغير المعاقين وين العدالة ؟!..
هل تعلم أخي انت وهو ان أكثر مكان في الدولة يضيع الملفات ويضيع مجهود المعاق وولي امره لمدة شهور هي هيئة المعاقين بسبب اهمال وعنجهية الموظفين يبا استخدموا التكنلوجيا وفكونا !.. من عقد هالنفسيات اللي عند البعض من موظفين الهيئة اللي اول مايشوفونا يحسبونا نطر ونشحذ منهم !.. وبالأخير نسال الله ان يعجل بالفرج وأختم بسؤال واحد متى نسوي معاملاتنا بالنت واحنا قاعدين في بيوتنا ياحكومة .
الرجل : رسالة معاق نرجو ان تجد لها صدي عن أعضاء الأمة والشعب .. وحياكم الله يوم الثلاثاء بالاعتصام .
المتمولس : سأل ولد أمه قائلا : في أي سن يا أمي استطيع أن أغادر المنزل دون الاستئذان منك فأجابته أمه : ابوك للحين ماوصل السن هذا اسكت أحسن لك .
وفي هذه الأثناء رفع على مسامعنا الشيخ زغلول آذان الظهر .
أضف تعليق